Ömürlük sevgi emosional bağlılıqdan çox, qarşılıqlı hörmət və anlayış üzərində qurulur"
Müasir dövrdə münasibətlərin tez sönməsi və ayrılıqların artması fonunda "ömürlük sevgi" anlayışı bir çox insan üçün artıq ideal kimi görünür.
Psixoloq Dilarə Yusifzadə BiG.AZ-a bildirib ki, uzunömürlü və dayanıqlı sevgi təsadüfi yaranmır, o, emosional sabitlik, qarşılıqlı hörmət və empatiya üzərində formalaşır:
"İnsanların çoxu sevgini yalnız güclü hiss kimi qəbul edir, halbuki bu, münasibətin yalnız başlanğıc mərhələsidir. Sevgi sadəcə emosional coşqu deyil. Zaman keçdikcə bu hiss anlayış, qayğı, hörmət və sadiqliklə əvəz olunmalıdır. Əgər tərəflər bir-birini dəyişdirməyə yox, anlamağa çalışırsa, o zaman münasibət uzunömürlü olur. Ömürlük sevginin əsas sirri ünsiyyətdədir. Açıq və dürüst dialoq münasibətdə inamı qoruyur.
Susqunluq və gizlətmələr münasibətdə emosional məsafə yaradır. Problemləri gizlətmək yox, onları birlikdə həll etməyə yönəlmək daha sağlamdır.
Sevgi özünü itirmək deyil. Hər iki tərəf öz şəxsiyyətini, dostlarını, maraqlarını və hüdudlarını qoruyarsa, bu, münasibəti zəiflətmir, əksinə, onu möhkəmləndirir.
Ömürlük sevgi realdır, amma yalnız o zaman ki, tərəflər "biri üçün yaşamaq" yox, "birlikdə yaşamağı" öyrənirlər".
