Mozambikdə vəba epidemiyası ilə bağlı vəziyyət ağır olaraq qalır.
BAKU.WS xəbər verir ki, 2025-ci ilin sentyabrından bu günədək ölkədə 2 650 nəfərdə vəba aşkarlanıb, xəstəlik 32 nəfərin həyatına son qoyub.
Ölkənin səhiyyə qurumlarının açıqlamasına görə, ən çox itki Nampula əyalətində qeydə alınıb. Bu bölgədə 1 314 yoluxma halı və 17 ölüm baş verib. Tete əyalətində 932 yoluxma və 13 ölüm, Kabu-Delqaduda isə 404 yoluxma və 2 ölüm faktı təsdiqlənib.
Xatırladaq ki, Mozambikdə bundan əvvəlki vəba dalğası 2024-cü ilin payızından 2025-ci ilin iyulunadək davam edib və həmin dövrdə 4 420 yoluxma, 64 ölüm qeydə alınmışdı.
Mozambikin səhiyyə naziri Usseni İsseni bildirib ki, epidemiyanın qarşısını almaq məqsədilə xaricdən 3,5 milyon doza vəba vaksini tədarük olunub. Hakimiyyət orqanları dövri şəkildə baş verən vəba epidemiyalarını 2030-cu ilə qədər tam nəzarət altına almağı hədəfləyir.
